في السنوات الأخيرة، كتير من البنات المصريات بتسافر تدرس أو تشتغل بره مصر، وظهر تفوقهم وتميزهم في مختلف المجالات حول العالم. لكن في نفس الوقت فيه بنات بتواجه بعض الصعوبات في تحقيق هدفها.
مترددة في قرار البحث عن فرصة السفر؟
بغض النظر عن فوائد السفر العامة اللي مش هتكفيها مقالات ومقالات، والفوائد العلمية والمادية والنفسية للدراسة أوالعمل خارج مصر، السفر ليه فوائد للبنت المصرية خصوصا:
- فرصة للاعتماد على النفس بصورة أكبر: وده كتير مش بيبقى متاح داخل مصر إما بسبب قلة الفرص أحيانا، أو رغبة الأهل في راحة بنتهم وأنها (متشيلش هم). مفيش طريقة لتعليم الاعتماد على النفس غير بالتجربة الفعلية.
- تجربة بيئة جديدة أكثر إيجابية: وده مش معناه أبدا أن تجربة السفر هتكون من غير سلبيات، لكن الإيجابيات ممكن تكون موجودة بصورة أكبر.
بديهيات\
في الغالب قرار السفر، خصوصا للمرة الأولى، قرار مش بسيط، وحتى مع الحماس والسعادة ممكن يبقى صعب نفسيا على أي حد سواءا ولد أو بنت وعلى عائلاتهم.
كمان لازم تعرفي أن رأي أو نظرة المجتمع لسفرك سواءا كانت بالسلب أو الإيجاب متهمكيش! ومفروض متبقاش في حساباتك سواءا لقبول أو رفض فرصة السفر. المجتمع رأيه بيتغير، لكن هدفك وقرارك لازم يبقى ثابت.- ________________________________________________
- في السطور الجاية هنتكلم عن أشهر تحدي فعلي بتواجهه بعض البنات اللي عايزة تسافر، وهيا موافقة الأهل. الهدف هو إيجاد حل لنقطة الخلاف في وجهات النظر، لأن ده في رأينا أفضل بكتير من أن طرف يفرض قراره على الطرف التاني.
عدم موافقة الأهل المبدئية مش غريب ومش نهاية الطريق!
- رفض أو تردد الأهل في مصر لفكرة سفر البنت (والولد كمان أحيانا!) غالبا بيبقى لأسباب ملهاش علاقة بالـ (الرجعية) زي ما ممكن يجي في دماغ القارئ للوهلة الأولى. كتير من الأهل بيبقى عندهم خوف حقيقي على بناتهم نابع من حبهم الشديد، سواءا بسبب اللي بيسمعوه كل فترة من حوادث أو إرهاب أو حتى كوارث طبيعية، أو مثلا بسبب أنهم معتقدين أن بنتهم المدللة مش هتقدر تعتمد على نفسها وتعيش لوحدها. طبعا فيه نسبة رفض ممكن تكون بسبب موروثات فكرية، لكن الكويس أن فيه مفتاح لحل المشكلة!
ازاي أضمن موافقة الأهل على السفر؟
- دوري واختاري فرصة سفر ممتازة ليكي، مثلا منحة دراسية في جامعة كويسة، أو عمل في مجال بتحبيه ومتميزة فيه. كقاعدة عامة الفرصة اللي إنتي شايفاها كويسة هتبقى مرضية لعائلتك. لو انتي شخصيا عندك شك أو نقاط سلبية على فرصة السفر في الغالب هيكون الأهل عندهم نفس الرأي.
- في مقولة إنجليزية بتقول Learn how to pick your battles، بمعنى أن يبقى عندك مهارة اختيار الوقت المناسب والطريقة المناسبة للمناقشة والاختلاف. مثلا، لو عندك احساس أو توقع أن أهلك مش هيرحبوا بفكرة السفر، يبقى بلاش المناقشة في الموضوع قبل ما يبقى في إيدك فرصة سفر فعلا. المناقشات البيزنطية (زي ما بنقول، اللي هيا المناقشات بدون نتيجة حقيقية مرجوة من المناقشة) مش مفيدة أبدا وبتأدي لزيادة العناد وصعوبة تغيير الموقف بعد كده.
- كونك مستقلة بتفكيرك وقرارك دي حاجة مهمة ومطلوبة، لكن كمان ممكن يكون مفيد لو أشركتي رأي عائلتك معاكي في اختيار فرصة السفر ومراحل التقديم (لو واثقة من دعمهم، وده الغالب والطبيعي)، بحيث يحسوا أنهم جزء من القرار ده وبالتالي تضمني موافقتهم النهائية.
أعمل إيه لو أهلي رفضوا فكرة السفر؟
في كل الأحوال لازم تعرفي أن عدم تحمس الأهل للفكرة أو الرفض المبدئي مش معناه وجود مشكلة حقيقية، كتير بيكون الرفض لغياب توضيح أو معلومات وبيزول لما التفاصيل تكون معروفة، أو حتى بمرور الوقت والتفكير مدة أطول.
دي أغلب أسباب الرفض من وجهة نظرنا:- خوف مبني على احتمالات مجهولة: مثلا خوف على السلامة الشخصية، أو خوف من نقص الموارد المالية أثناء السفر. دي ممكن مناقشتها بالمنطق والدليل، مثلا ممكن تجيبي دراسة عن معدل الجريمة في المكان اللي هتسافريله وتقارنيه بالمعدل المصري. أو تثبتي أن المبلغ المتاح من المنحة الدراسية أو الراتب يكفي مصاريف المعيشة من مقدم المنحة أو من مصدر آخر.
- رغبة الأهل في الاطمئنان على مدار اليوم: النقطة دي دلوقتي من أسهل ما يكون مع مجانية الاتصال المرئي والصوتي سواءا من الموبايل أو الكمبيوتر. أكدي للأهل أنك هتتصلي أكثر من مرة في اليوم، واتأكدي من تأمين اتصال انترنت سريع وكمبيوتر أو موبايل مناسب في البيت قبل السفر.
- أسباب متعلقة بموروثات فكرية: مثلا رفض فكرة سفر البنت بدون زوج. حاولي تشوفي أمثلة من محيط الأسرة أو الأصدقاء من بنات زواجهم أدى إلى إلغاء فكرة السفر نهائيا، أو العكس، بنات قابلوا شريك حياتهم أثناء السفر! أو ممكن تعرضي فكرة مرافقة الأهل ليكي أو زيارتهم، لو كانت ممكنة، كحل أخير.
- عدم وجود سبب واضح أو منطقي للرفض: في الحالة دي المناقشة بالمنطق ممكن متبقاش مفيدة، حاولي تطلبي مساعدة شخص عائلتك بتثق في رأيه زي صديق قديم أو جار، أنه يتكلم معاهم ويحاول يقنعهم. كتير بيغيروا رأيهم لما يسمعوا من حد في سنهم أو مر بنفس خبراتهم.
- *************************************************************************
-
- Good luck, God willing
Media Team
Shabab Talanted
-
